జనానికి మరో ఊరట

కొత్త నోట్ల కోసం ఇబ్బంది పడుతున్న ప్రజలకు మరో వెసలుబాటు కల్పించింది స్టేట్ బ్యాంక్ ఆఫ్ ఇండియా ( SBI ). ఇప్పటి వరకు బిగ్ బజార్లలో డెబిట్ కార్డ్ పై రూ.2వేలు వరకు తీసుకునే వెసలుబాటు ఇచ్చింది. ఇప్పుడు ఐనాక్స్ ధియేటర్లలోనూ ఇలాంటి అవకాశాన్ని కల్పించింది. ఒకటో తేదీ వస్తుండటం.. సిటీలో పూర్తి స్థాయిలో ATMలు పని చేయక ఇబ్బంది పడుతున్న జనానికి మరో ఊరట ఇది. ఐనాక్స్ ధియేటర్లలో డెబిట్ కార్డ్ ద్వారా రూ.2వేలు తీసుకోవచ్చు. ఏ బ్యాంక్ కార్డ్ అయినా పర్వాలేదని.. అన్ని డెబిట్ కార్డులకు ఇది వర్తిస్తుందని ప్రకటించింది SBI. ధియేటర్లలో డబ్బులు తీసుకున్న వారు.. అక్కడ సినిమా చూడాల్సిన నిబంధన ఏమీ లేదు.

Read More

చిరంజీవి రెమ్యునరేషన్‌ ఎంతో తెలుసా?

దాదాపు రెండు దశాబ్దాల పాటు తెలుగు సినీ ఇండస్ట్రీని ఏలిన చిరంజీవి పారితోషికం విషయంలోనూ టాపే. ఆ తర్వాత రాజకీయాల్లోకి ప్రవేశించడం, మళ్లీ సినిమా పరిశ్రమ తలుపు తట్టడం జరిగిపోయాయి. ప్రస్తుతం ఆయన తన 150వ సినిమా పనిలో బిజీగా ఉన్నారు. అలాగే ఇప్పటి వరకు నాగార్జున నిర్వహించిన ‘మీలో ఎవరు కోటీశ్వరుడు’ ప్రోగ్రామ్‌కు హోస్ట్‌గా కూడా వ్యవహరించనున్నారు.

 

ఈ ప్రోగ్రామ్‌ కోసం చిరంజీవికి భారీగా రెమ్యునరేషన్‌ ఫిక్స్‌ చేశారట నిర్వాహకులు. ఒక్కో ఎపిసోడ్‌కు పదిలక్షల రూపాయలు చిరంజీవి తీసుకోనున్నారని వార్తలు వెలువడుతున్నాయి. అలా ఎన్ని ఎపిసోడ్‌లు ప్రసారమైతే అన్ని పదిలక్షలన్న మాట. మెగాస్టార్‌కు ఉన్న క్రేజ్‌ రీత్యా ఈ రెమ్యునరేషన్‌ ఆయనకు ఇవ్వదగినదే. పైగా చిరంజీవి తొలిసారి బుల్లితెర మీద కనిపిస్తుండడంతో ప్రేక్షకులు ఆ షోకు బ్రహ్మరథం పడతారని నిర్వాహకులు అంచనా వేస్తున్నారు. ఆ షోకు చిరు మరింత గ్లామర్‌ తీసుకొస్తారనడంలో సందేహం లేదు.

Read More

మరో సంచలనానికి సిద్దమైన గూగుల్, ఫేస్‌బుక్

యావత్ ప్రపంచాన్ని ఇంటర్నెట్టుతో అనుసంధానించే కార్యక్రమంలో భాగంగా ఆన్‌లైన్ దిగ్గజాలు గూగుల్, ఫేస్‌బుక్ సంస్థలు మరో బృహత్తరకార్యానికి సన్నాహాలు చేస్తున్నాయి. సెకనుకు 15వేల జీబీల సమాచారాన్ని బదిలీ చేయగల అత్యంత శక్తిమంతమైన కేబుల్ తో ఆసియాను, అమెరికాలను సముద్ర అంతర్భాగం ద్వారా అనుసంధానించనున్నాయి. అమెరికాలోని లాస్ ఏంజిలస్ నగరం నుండి ప్రారంభమయ్యే ఈ కేబుల్ హాంకాంగ్ ను అనుసంధానిస్తుంది. సాంకేతిక భాషలో చెప్పాలంటే 120 టెరాబైట్స్ పర్ సెకండ్ వేగంతో ఈ కేబుల్ డేటాను బదిలీ చేస్తుంది. రెండు ఖండాలకు అటో దిక్కున ఇటో దిక్కున గల హాంకాంగుకు, లాస్ ఏంజిలస్ నగరాలకు మధ్య దూరం అక్షరాల 12800 కిలోమీటర్లు. ఇంటర్నెట్ చరిత్రలో ఈ ప్రాజెక్ట్ అతిపెద్ద విప్లవంగా చెప్పవచ్చు. పసిఫిక్ మహాసముద్రం అంతర్భాగం నుండి వేయనున్న ఈ ఇంటర్నెట్ కేబుల్ ప్రాజెక్టులో గూగుల్, ఫేస్ బుక్ తో పాటు పసిఫిక్ డేటా కమ్యూనికేషన్, టీఈ సబ్ కామ్ తదితర నాలుగు సంస్థలు పాలుపంచుకోనున్నాయి. వచ్చే రెండేళ్లలోగా ప్రాజెక్టును శరవేగంగా పూర్తిచేయాలని ఈ సంస్థలు కంకణం కట్టుకున్నాయి.

Read More

సొంత రాష్ట్రాన్ని కించపరుస్తావా!

తనకు బహుమతిగా దక్కిన బీఎండబ్ల్యూ కారును.. జిమ్నాస్ట్‌ దీపా కర్మాకర్‌ వెనక్కి ఇచ్చేస్తానని చేసిన ప్రకటనపై త్రిపుర ప్రభుత్వం గుర్రుగా ఉంది. త్రిపుర రహదారులు ఈ కారు తిరిగేందుకు అనువుగా లేవని, తగిన సర్వీస్‌ సెంటర్లు కూడా లేనందున.. బీఎండబ్ల్యూను వెనక్కి తీసుకొని.. దానికి తగిన నగదు కోరడాన్ని తప్పుబట్టింది. త్రిపురలో రాష్ట్రపతి, ప్రధాని సహా విదేశీ ప్రముఖుల కార్లు ఎటువంటి ఇబ్బంది లేకుండానే తిరిగాయని ప్రజా పనుల శాఖ మంత్రి బాదల్‌ పేర్కొన్నారు. స్వరాష్ట్రాన్ని కించపరిచేలా మాట్లాడిన దీపకు ప్రజలే తగిన గుణపాఠం చెబుతారని రవాణా మంత్రి మాణిక్‌దేవ్‌ అన్నారు.

Read More

మాటలు చెప్పదు.. చేతలే! - భారత సైన్యానికి మోదీ ప్రశంస

సర్జికల్‌ దాడులకు ఆధారాలు చూపాలన్న ప్రతిపక్ష నేతలపై ప్రధాని మోదీ పరోక్షంగా విరుచుకుపడ్డారు. భారత సైన్యం వాక్‌శూరత్వం చూపదని, తన వీరత్వాన్ని ప్రదర్శిస్తుందని స్పష్టంచేశారు. శుక్రవారం భోపాల్లో ‘శౌర్య స్మారక్‌’ను ఆవిష్కరించిన ఆయన.. ఈ సందర్భంగా మాజీ సైనిక సిబ్బందిని ఉద్దేశించి ప్రసంగించారు. సరిహద్దులు, దేశాలకు అతీతంగా మానవ జాతిని భారత సైన్యం రక్షిస్తోందని కితాబిచ్చారు. ‘మన జవాన్ల గురించి మనం మాట్లాడుకునేటప్పుడు వారి యూనిఫారం, వారి ధైర్యసాహసాల గురించే ప్రస్తావిస్తుంటాం. కానీ అంతకుమించిన మూర్తీభవించిన మానవత్వం వారిలో ఉంది. వారు మాటలు చెప్పరు.. వీరత్వాన్ని చూపుతారు. మన రక్షణ మంత్రి మనోహర్‌ పరీకర్‌ కూడా అంతే’ అని హర్షధ్వానాల నడుమ చెప్పారు. సభికులు దేశభక్తి నినాదాలు చేశారు. ఇంతకుముందు తానీ వ్యాఖ్యలు చేసి ఉంటే విమర్శకులు తనపై దాడిచేసేవారని, మోదీ నిద్రపోతున్నారని, ఏమీ చేయడం లేదని అనేవారని తెలిపారు. ఐక్యరాజ్యసమితి శాంతిపరిరక్షక దళంలో భారత ప్రధాన భూమిక పోషిస్తోందన్నారు. ‘యెమెన్‌ యుద్ధంలో చిక్కుకుపోయిన ప్రజలను రక్షించడంలో భారత సైనికులు కీలక పాత్ర పోషించారు. 5వేల మంది భారతీయులను, పాకిస్తానీలతో పాటు ఇతర దేశాలవారినీ కాపాడారు. సరిహద్దులను రక్షిస్తూ.. మనం ప్రశాంతంగా నిద్రపోవడానికి తమ ప్రాణాలను త్యాగం చేస్తున్నారు’ అని కొనియాడారు. మేల్కొని ఉండాల్సిన సమయంలో నిద్రపోతే సరిహద్దుల్లో గస్తీ కాస్తున్న సైన్యం మనల్ని క్షమించదని స్పష్టం చేశారు. శివాజీ, మహారాణా ప్రతాప్‌ వంటివారు మన వీరత్వానికి ప్రతీకలని పరీకర్‌ పేర్కొన్నారు. ‘మనం ఎవరినీ ఇబ్బందిపెట్టం. ఎవరైనా మనల్ని ఇబ్బందిపెట్టాలని చూస్తే వదిలిపెట్టం అనేది ఆయన విధానం’ అని చెప్పారు.

Read More

ఎయిర్ సెల్ : రూ.24లకే 1జీబీ 3జీ డేటా

వినియోగదారులకు కొత్త ఆఫర్ ఇచ్చింది ఎయిర్ సెల్. రూ.24 లకే 1 జీబీ 3జీ డేటాను అందించనున్నట్టు ప్రకటించింది. 28 రోజుల పాటు దీని వ్యాలిడిటీ ఉంటుంది. అయితే దీనకంటే ముందు  రూ. 329లకు 2జీబీ 3జీ డేటాను రీచార్జ్ చేసుకుంటేనే ఈ ఆఫర్ వర్తిస్తుంది. దీని వ్యాలిడిటీ కూడా 28 రోజులు ఉంటుంది. ఈ ఆఫర్ రీ చార్జ్ చేసుకుంటే.. ఆ తర్వాత చేసుకునే ప్రతి రూ. 24 ల రీ చార్జ్ కు 1జీబీ 3జీ డేటా లభిస్తుంది.  ఈ ఆఫర్ రెండు తెలుగు రాష్ట్రాలతో పాటు చెన్నై, కర్ణాటక, అసోం, ఒడిషా, బీహార్, జార్ఖండ్, పంజాబ్, జమ్ము కాశ్మీర్ లలో ఉంటుంది.

Read More

చెలరేగిపోతున్న చైనా గూడ్స్‌

ఎన్‌ఎ్‌సజిలో భారత సభ్యత్వానికి మో కాలడ్డడం, తీవ్రవాది మసూద్‌ అజార్‌పై ఐరాస విధించదలచిన నిషేధాన్ని వ్యతిరేకిస్తున్నందున దేశంలో చైనా వస్తువులను బహిష్కరించాలని డిమాండ్లు ఒకపక్క వెల్లువెత్తుతున్నా.. మరోవైపు భారతలో చైనా వస్తువుల విక్రయాలు రికార్డు స్థాయికి చేరాయని చైనా మీడియా కోడై కూస్తోంది. భారతలో అతిపెద్ద పండుగ సీజన్‌ అయిన దివాళీ సీజన్‌లో షాపింగ్‌ జోరుగా సాగుతుందని, ఈ సీజన్‌లో చైనా గూడ్స్‌ను బహిష్కరించాలని సోషల్‌ మీడియాలో భారీగా ప్రచారం జరుగుతోందని చైనాకు చెందిన అధికారిక పత్రిక గ్లోబల్‌ టైమ్స్‌ కథనం పేర్కొంది. కొందరు భారత రాజకీయ నాయకులు కూడా ఇందుకు ఆజ్యం పోస్తున్నారని, ఇంత ఎత్తు న వ్యతిరేక ప్రచారం జరుగుతున్నా... భారతలో చైనా గూడ్స్‌కు విపరీతమైన పాపులారిటీ ఉందని, ఇండియా ప్రభుత్వం చైనా వస్తువులపై ఎలాంటి నిషేధం విధించలేదని తెలిపింది. 
బహిష్కరణ ప్రచారం ఎలాంటి ప్రభావం చూపలేకపోయిందని, అక్టోబర్‌లో భారత టాప్‌3 ఆన్‌లైన్‌ రిటైలర్లు విక్రయించిన వస్తువుల్లో చైనా ఉత్పత్తులు రికార్డు స్థాయిని నమోదు చేశాయని పేర్కొంది. 
మీకే నష్టం... 
ద్వైపాక్షిక వాణిజ్యం చైనా, భారత మధ్య బంధానికి మూలాల్లో ఒకటని, 2015లో ఇరుదేశాల మధ్య వాణిజ్యం 7,000 కోట్ల డాలర్లకు చేరిందని గ్లోబల్‌టైమ్స్‌ తెలిపింది. చైనాతో వాణిజ్యంలో పెరిగిపోతున్న లోటు పట్ల భారత ఆందోళన వ్యక్తం చేస్తోంది. ఈ లోటుకు భారత చర్యలే కారణమని గ్లోబల్‌ టైమ్స్‌ విమర్శించింది. ఈ లోటు తగ్గించి సమతుల్యం సాధించడానికి ఇరు దేశాలు తగిన చర్యలు తీసుకోవాలని, గతంలో తీసుకున్న చర్యలు పెద్దగా ప్రభావం చూపలేదని తెలిపింది.

Read More

కొత్త జిల్లాలతో రెవెన్యూ ఖజానా కళకళ

రాష్ట్ర రెవెన్యూ ఆదాయం పెరుగుతోంది. కొత్త జిల్లాల ఆలోచన కూడా  రెవెన్యూ ఖజానాకు కళ తీసుకొచ్చింది. హైదరాబాద్ సహా… జిల్లాల్లో … రియల్ ఎస్టేట్ వ్యాపారం జోరందుకోవడమే గాకుండా రికార్డు స్థాయిలో భూముల అమ్మకాలు, కొనుగోళ్లు జరిగాయి. గత ఆరునెలల కాలంలోరాష్ట్రంలో భూములు, భవనాల అమ్మకాల్లో 31.21 శాతం పెరుగుదల కనిపించినట్టు ప్రభుత్వ లెక్కలు చెబుతున్నాయి.

ఈ ఏడాది ఏప్రిల్ నుంచి సెప్టెంబర్ మధ్య  ఆరు నెలల కాలంలో… 19వందల35 కోట్లు ప్రభుత్వ రెవెన్యూ శాఖ ఖజానాకు చేరాయి.

గత ఏడాది.. ఇదే కాలంలో.. సర్కారుకు స్టాంపులు, రిజిష్ట్రేషన్ల శాఖ ద్వారా 14వందల75 కోట్లు వచ్చింది.

ఈ ఆర్ధిక సంవత్సరం ఏప్రిల్ నెలలో 306 కోట్లు,  మే నెలలో 370 కోట్లు, జూన్ లో 310 కోట్లు, జూలైలో  310 కోట్లు, ఆగస్టులో 329 కోట్లు, సెప్టెంబర్ నెలలో 310 కోట్ల ఆదాయం ప్రభుత్వానికి వచ్చింది.

ఈ ఆర్ధిక సంవత్సరానికి ప్రభుత్వం స్టాంపు, రెవెన్యూ శాఖ ద్వారా పెట్టుకున్న టార్గెట్ 4వేల291 కోట్లు. తొలి ఆరు నెలల్లోనే… 45 శాతం ఆదాయ  లక్ష్యాన్ని సర్కారు చేరుకుంది.

దక్షిణాది రాష్ట్రాలతో పోల్చితే… తెలంగాణ స్థిరమైన ఆదాయంతో అగ్రభాగాన ఉందనీ.. ఏపీలో 12. 27 శాతం వృద్ధి ఉంటే… కర్ణాటకలో 2. 31 శాతం, కేరళలో 3. 57 శాతం, తమిళనాడులో మైనస్ 2.63 శాతం వృద్ధి ఉందని ప్రభుత్వం తెలిపింది. జిల్లాల వారీగా చూస్తే… మెదక్ నుంచి ఎక్కువ ఆదాయం దక్కింది. మెదక్ లో అత్యధికంగా 47. 94 శాతం వృద్ధి కనిపించింది. ఆ తర్వాత.. హైదరాబాద్, రంగారెడ్డి.. మహబూబ్ నగర్, వరంగల్ కరీంనగర్, నిజామాబాద్ లలో గ్రోత్ ఉంది. అత్యల్పంగా నల్గొండలో రెవెన్యూ గ్రోత్ రేట్ ఆరు శాతమే ఉంది. ఏడాది   ఐదు లక్షల 76 వేల 991 డాక్యుమెంట్లు రిజిస్టర్ అయినట్టు సర్కారు తెలిపింది.

Read More

రూ.35,000 కోట్లు ముంచిన నోట్‌7

గెలాక్సీ నోట్‌ 7 స్మార్ట్‌ఫోన్లను వెనక్కి రప్పించడం, విక్రయాల నిలిపివేత వల్ల శామ్‌సంగ్‌పై తీవ్ర ప్రభావం పడనుంది. ప్రస్తుత త్రైమాసికంలో మొబైల్‌ వ్యాపారం ద్వారా వచ్చే లాభమంతా కోల్పోయే అవకాశం ఉంది. నోట్‌ 7 విక్రయాల నిలిపివేత ప్రభావంతో ప్రస్తుత, రాబోయే త్రైమాసికాల్లో 300 కోట్ల డాలర్ల (సుమారు రూ.20000 కోట్లు) భారం పడనుందని శామ్‌సంగ్‌ వెల్లడించింది. దీంతో ఈ ఫోన్లను వెనక్కి రప్పించడం వల్ల మొత్తంగా పడే భారం 530 కోట్ల డాలర్లని (రూ.35000 కోట్లు) తెలిపింది. బ్యాటరీ వేడెక్కడం, పేలిపోవడం లాంటి సంఘటనలు చోటుచేసుకోవడంతో గెలాక్సీ నోట్‌ 7 విక్రయాలను శామ్‌సంగ్‌ నిలిపివేసిన సంగతి తెలిసిందే. ఈ పరిణామం దృష్ట్యా ఇప్పటికే అక్టోబరు- డిసెంబరు త్రైమాసికానికి లాభం అంచనాలను 260 కోట్ల డాలర్ల (రూ.17000 కోట్లు) వరకు తగ్గించింది. అంటే మొబైల్‌ వ్యాపారం ద్వారా వచ్చే లాభాన్ని పూర్తిగా శామ్‌సంగ్‌ కోల్పోనుందన్నమాట. అయితే పై మొత్తంలో మొదటి సారి రీకాల్‌ వ్యయ భారాన్ని కంపెనీ కలపలేదు. విశ్లేషకుల అంచనా ప్రకారం ఈ భారం 88 కోట్ల డాలర్ల (1 ట్రిలియన్‌ వాన్‌) నుంచి 166 కోట్ల డాలర్ల (2 ట్రిలియన్‌ వాన్‌) వరకు ఉండే అవకాశం ఉంది. రీకాల్‌ వల్ల పడే భారాన్ని ఇతర వ్యాపారాల ద్వారా శామ్‌సంగ్‌ తగ్గించుకునే అవకాశం కనిపిస్తంది. రీకాల్‌ వ్యయ భారం పోను మూడో త్రైమాసికంలో 460 కోట్ల డాలర్ల (దాదాపు రూ.30,000 కోట్లు) ఆదాయాన్ని ఆర్జిస్తామని కంపెనీ ఆశాభావంతో ఉంది. అయితే ఇందులో చాలా భాగం అడ్వాన్స్‌డ్‌ డిస్‌ప్లేలు, సెమీ కండక్లర్ల విక్రయాల ద్వారా వచ్చే అవకాశం ఉందని విశ్లేషకులు అంచనా వేస్తున్నారు. అలాగే నాణ్యత ప్రమాణాల ప్రక్రియను మెరుగుపర్చుకునేందుకు గణనీయమైన మార్పులకు శ్రీకారం చుట్టుబోతున్నట్లు శామ్‌సంగ్‌ తెలిపింది. అయితే పూర్తి వివరాలను కంపెనీ వెల్లడించలేదు.

భారత్‌లో రూ.6,457 కోట్లు..
గెలాక్సీ నోట్‌ 7 రీకాల్‌ ప్రభావంతో శామ్‌సంగ్‌ ఇండియా రూ.6,457 కోట్ల ఆదాయాన్ని కోల్పోయే అవకాశం ఉందని పరిశోధన సంస్థ సీఎంఆర్‌ వెల్లడించింది. ‘ప్రస్తుత ఆర్థిక సంవత్సరంలో శామ్‌సంగ్‌ ఇండియా ఆదాయం 46 శాతం వృద్ధితో రూ.45,446 కోట్లు నమోదుకావొచ్చని ఇంతకుమునుపు అంచనా వేశాం. అయితే నోట్‌ 7 పరిణామం నేపథ్యంలో ఆదాయం 25 శాతం మాత్రమే పెరిగి రూ.39,989 కోట్లుగా ఉండొచ్చని అనుకుంటున్నామ’ని తెలిపింది. అయితే కంపెనీ ఆర్థిక గణాంకాలపై ఆయా పరిశోధన సంస్థలు వెల్లడిస్తున్న అంచనాలు తప్పులని శామ్‌సంగ్‌ ఇండియా అధికార ప్రతినిధి ఒకరు అన్నారు. ‘గెలాక్సీ నోట్‌ 7ను ఇప్పటివరకు భారత్‌లో విక్రయించలేదు. వస్తోన్న నివేదికలకు భిన్నంగా ఈ ఏడాది రికార్డు విక్రయాలను సాధిస్తామ’ని తెలిపారు.

Read More

కశ్మీర్‌లో చైనా జెండాల ప్రదర్శన !

కశ్మీర్ లో వేర్పాటు వాదుల ఆగడాలకు అడ్డూ అదుపూ లేకుండా పోతోంది. ఇప్పటి వరకు పాక్ జెండాలు మాత్రమే ఎగురవేసిన అల్లరిమూకలు తొలిసారిగా పాక్ జెండాలతో పాటు చైనా జెండాలు ప్రదర్శించారు. బారాముల్లా ప్రాంతంలో ఈ ఘటన చోటు చేసుకుంది. కాగా తమ పోరాటంలో చైనా సాయం కావాలంటూ పిచ్చిరాతలు రాశారు. ర్యాలీ సందర్భంగా జెండాలు పట్టుకున్న వారు తమ ముఖాలు కనిపించకుండా ముఖాలకు మాస్కులు ధరించారు. అలాగే విధుల్లో ఉన్న పోలీసులపై కూడా ఈ అల్లరిమూకలు రాళ్లు రువ్వాయి. పరిస్థితిని అదపులోకి తెచ్చేందుకు పోలీసులు టియర్ గ్యాస్ ప్రయోగించాల్సి వచ్చింది. చైనా అధ్యక్షుడు జిన్ పింగ్ గోవాలో బ్రిక్స్ శిగరాగ్ర సదస్సు పాల్గొనేందుకు భారత్ వచ్చిన సందర్భంలో ఇలాంటి పోకడలు కనిపించడం విశేషం.

Read More