బాహుబలి-2 ప్రి రిలీజ్ బిజినెస్ ఎంతంటే..

విడుదలకు ముందే బాహుబలి-2 ఎన్నెన్నో అంచనాలు పెంచేస్తోంది. ఆ సినిమాకు సంబంధించి బాహుబలిని కట్టప్ప ఎందుకు చంపాడు? అన్నదానికి సమాధానం దొరకాలంటే.. రెండో పార్ట్ విడుదలవ్వాల్సిందే. ఆ ప్రశ్న ఎంత సంచలనంగా మారిందో.. ఇప్పుడు బాహుబలి మార్కెట్ (బిజినెస్) కూడా సంచలనంగా మారుతోంది. బాహుబలి-2 ప్రి రిలీజ్ బిజినెస్ బాహుబలి కన్నా 40 శాతం ఎక్కువగా ఉంటుందని ట్రేడ్ వర్గాలు అంటున్నాయి. ఇప్పటికే ఉత్తర అమెరికా (ఓవర్సీస్)లో ఆ సినిమా హక్కులను రూ.45 కోట్లకు కొనుగోలు చేసినట్లు సమాచారం. అదే నిజమైతే అక్కడ ఓ కొత్త రికార్డు నమోదైనట్టే. ఇక, ఇటు నైజాంలోనూ భారీ బిజినెస్ చేస్తోందట బాహుబలి-ది కన్‌క్లూజన్. ఏషియన్ ఫిల్మ్స్ అధిపతి సునీల్ నారంగ్ రూ.45 కోట్లకు సినిమా హక్కులను కొన్నట్టు వార్తలు వినిపిస్తున్నాయి. వాస్తవానికి నైజాంలో బాహుబలి తొలి పార్టు మొత్తం కలెక్షన్లే రూ.43 కోట్లు. దీంతో ఇప్పుడు రెండో బాహుబలికి రూ.45 కోట్లను ఇస్తున్నాడట సదరు డిస్ట్రిబ్యూటర్. అంతేకాదు.. ఫుల్‌రన్‌లో ఒక్క నైజాంలోనే రూ.65 కోట్ల వరకు వసూళ్లు వస్తాయని అతడు చాలా నమ్మకంగా ఉన్నాడట. వాస్తవానికి బాహుబలి నైజాం హక్కులను ఇదివరకు దిల్ రాజు తీసుకోగా.. బాహుబలి-2కి నిర్మాతలు అధిక మొత్తాన్ని కోట్ చేయడంతో తప్పుకొన్నాడని టాక్. మరి బాహుబలి-2పై ఎవరి నిర్ణయం సరైందో తెలియాలంటే వచ్చే ఏడాది ఏప్రిల్ వరకు నిరీక్షణ తప్పదు.