రూ.834కే విమాన టికెట్‌

పండగ సీజన్‌లో ప్రయాణికులను ఆకట్టుకునేందుకు ప్రముఖ విమానయాన సంస్థ ఇండిగో సరికొత్త ఆఫర్‌తో ముందుకొచ్చింది. ఎంపిక చేసిన దేశీయ విమాన మార్గాల్లో అన్ని ఛార్జీలు కలిపి రూ.834 ప్రారంభ ధరతో విమాన టికెట్లు అందిస్తోంది. అక్టోబర్‌ 17 వరకు ఈ ప్రమోషనల్‌ ఆఫర్‌ వినియోగదారులకు అందుబాటులో ఉండనుంది. అక్టోబర్‌ 30, 2016 నుంచి ఏప్రిల్‌ 13, 2017 మధ్య ఇండిగో విమానాల్లో ప్రయాణించేవారికి ఈ ఆఫర్‌ వర్తిస్తుంది.

ఈ ప్రమోషనల్‌ ఆఫర్‌ కింద దిల్లీ-జైపూర్‌ ఇండిగో విమాన టికెట్‌ ప్రారంభ ధర రూ. 867గా ఉంది. కాగా.. ఈ ఆఫర్‌ కింద ఎన్ని సీట్లను కేటాయించిందన్న వివరాలను మాత్రం ఇండిగో వెల్లడించలేదు. అయితే ఈ ఆఫర్‌ కింద అమ్మే టికెట్లు నాన్‌ రిఫండబుల్‌ అని సంస్థ ప్రకటించింది. అంటే ఒకవేళ టికెట్‌ను రద్దు చేసుకున్నట్లయితే.. మొత్తం సొమ్మును ప్రయాణికులకు తిరిగి ఇవ్వబోరు. కేవలం పన్ను ఛార్జీలను మాత్రమే ఇస్తారు. అంతేగాక, పండగ రద్దీ దృష్ట్యా ప్రస్తుతమున్న మార్గాల్లోనే 47 కొత్త విమానాలను నడపనున్నట్లు ఇండిగో తెలిపింది.