అలా చేస్తే సంబంధాలు దెబ్బతింటాయి... చైనా హెచ్చరిక

భారతీయులు తల్చుకుంటే వ్యాపారాలు దెబ్బతింటాయన్న భయం చైనాకు కూడా ఉందని స్పష్టమవుతోంది. నేరుగా చెప్పకుండా పరోక్షంగా హెచ్చరికలు, సలహాలు ఇస్తోంది. రాజకీయ సమస్యలను బాహాటంగా చాటిచెప్పడం కోసం చైనా వస్తువులను బహిష్కరించడం వల్ల ప్రయోజనం ఏమీ ఉండదని ఆ దేశంలోని ‘గ్లోబల్ టైమ్స్’ పత్రిక శుక్రవారం ప్రచురించిన ఓ వ్యాసంలో పేర్కొంది. ఇలాంటి చర్యల వల్ల ఇరు దేశాల మధ్య ద్వైపాక్షిక సంబంధాలు దెబ్బతింటాయంటోంది. అందుకు బదులుగా ఇండియాలో ఇండస్ట్రియల్ స్ట్రక్చర్‌ను అప్‌గ్రేడ్ చేసుకోవాలని సలహా ఇచ్చింది. వాణిజ్య లోటును భర్తీ చేయడానికి ఇదే సరైన మార్గమని పేర్కొంది. చైనా వస్తువులకు దూరంగా ఉంటూ రక్షణ వాదాన్ని అనుసరించకుండా, ఇరు దేశాల వాణిజ్యంలో ఏర్పడిన భారీ లోటును పారిశ్రామిక మౌలిక సదుపాయాలను విస్తరించుకోవాలని తెలిపింది. వాణిజ్య రక్షణవాదం ద్వారా చైనాతో వాణిజ్య లోటును తగ్గించుకోవాలని భారతదేశం ప్రయత్నిస్తోందని మార్చిలో భారతీయ మీడియా పేర్కొందని, మరోవైపు సోషల్ మీడియాలో చైనా వస్తువులను కొనవద్దని భారతీయులను కోరుతున్నారని, ఇటువంటి రక్షణ వాదం వల్ల ఇరు దేశాల సంబంధాలు దెబ్బతింటాయని పేర్కొంది.దీనివల్ల వాణిజ్యలోటు తగ్గకపోగా ద్వైపాక్షిక సంబంధాలకు నష్టం జరుగుతుందని తెలిపింది.