ఆ సినిమా ‘బాహుబలి 2’కి పోటీ కాదు

‘సన్స్‌ ఆఫ్‌ సర్దార్‌’ చిత్రం ‘బాహుబలి 2’కి పోటీకాదని బాలీవుడ్‌ హీరో అజయ్‌దేవగణ్‌ అన్నారు. ‘శివాయ్‌’ తర్వాత ఆయన దర్శకత్వం వహిస్తున్న చిత్రం ‘సన్స్‌ ఆఫ్‌ సర్దార్‌’. సరగర్హి యుద్ధం ఆధారంగా ఈ చిత్రాన్ని తెరకెక్కించనున్నారు. ఈ చిత్రాన్ని హాలీవుడ్‌ తరహాలో ఇండియాలోనే పెద్ద యుద్ధ చిత్రంగా తీయడానికి ప్రయత్నిస్తున్నట్లు అజయ్‌ ఇటీవల ఓ ఇంటర్వ్యూలో చెప్పారు. ఇప్పటి వరకు దేశం నుంచి ‘బాహుబలి’ చిత్రం మాత్రమే యుద్ధ నేపథ్యంలో భారీగా విడుదలై ప్రపంచవ్యాప్తంగా మన్ననలు పొందింది. వచ్చే ఏడాది ఏప్రిల్‌ 28న ఈ చిత్రానికి కొనసాగింపుగా తీస్తున్న ‘బాహుబలి 2’ కూడా విడుదలకు సిద్ధమౌతోంది. అయితే ‘సన్స్‌ ఆఫ్‌ సర్దార్‌’.. ‘బాహుబలి’ స్థాయిలో ఉంటుందా? అని మీడియా అడిగిన ప్రశ్నకు అజయ్‌ సమాధానం ఇచ్చారు.

‘ఒక్కసారి మనం ‘బాహుబలి 2’ చూద్దాం, ‘సన్స్‌ ఆఫ్‌ సర్దార్‌’ని దాని కన్నా పెద్దగా తీయడానికి నేను స్ఫూర్తి పొందుతానేమో. ఇది మా మధ్య పోటీ కాదు, స్ఫూర్తి మాత్రమే’ అని అజయ్‌ అన్నారు. ‘సన్స్‌ ఆఫ్‌ సర్దార్‌’ చిత్రం షూటింగ్‌ వచ్చే ఏడాది చివర్లో ప్రారంభం కానుంది. 2018 ముగింపులో దీన్ని విడుదల చేయడానికి నిర్మాతలు సన్నాహాలు చేస్తున్నట్లు సమాచారం. ఈ చిత్రానికి సంబంధించిన నటీనటుల జాబితాను ఇంకా ప్రకటించాల్సి ఉంది.